Il-Ġublew u l-Lectio Divina
Aħna u nimxu lejn il-Ġublew, ejjew nerġgħu lura għall-Iskrittura Mqaddsa u nisimgħu jitlissnu lilna dawn il-kelmiet: “Aħna, li sibna l-kenn, ikollna qalbna qawwija sewwa li niksbu t-tama li hemm lesta għalina. “Din it-tama hija għalina bħal ankra tar-ruħ, sħiħa u qawwija; biha aħna nidħlu ’l ġewwa mill-velu, fejn qabilna daħal Ġesù għalina” (Lhud 6:18-20). (Spes nin confundit, 25)
Minn dak li kiteb il-Papa Franġisku fil-Bolla tal-Indizzjoni tal-Ġublew 2025, toħroġ qawwija l-istedina sabiex matul il-mixja tagħna lejn il-ġrajja tal-Ġublew 2025: Pellegrini tat-Tama, imma wkoll ‘l hinn minnha, aħna nimxu pass pass mal-gwida li toffrilna l-Kelma ta’ Alla.
Fis-sensiela ta’ 38 katekeżi dwar it-talb li l-Papa Franġisku għamel bejn l-2020 u l-2021, kien tkellem ukoll dwar it-talb bl-Iskrittura Mqaddsa u fisser kif aħna nistgħu nitolbu b’silta mill-Bibbja għaliex il-kelmiet tal-Iskrittura Mqaddsa ma ġewx miktuba biex jibqgħu msakkra fuq il-papir, fuq l-iskroll jew fuq il-karta, imma biex jiġu milqugħa minn persuna li titlob, biex tħallihom jagħmlu l-frott f’qalbha. Dakinhar huwa fakkar li t-tradizzjoni Nisranija hi għanja b’esperjenzi u b’riflessjonijiet fuq it-talb bl-Iskrittura Mqaddsa. B’mod partikulari, issaħħaħ il-metodu tal-“lectio divina”, li nibet f’ambjent monastiku, imma llum hu pprattikat anki mill-Insara li jiffrekwentaw il-parroċċi.
Il-Lectio Divina, li l-Papa Franġisku tkellem dwarha diversi drabi, tista’ tkun għalina, forma ta’ talba li tgħinna b’mod prattiku biex illum, aħna wkoll ngħixu l-istess esperjenza li kellhom huma, elfejn sena ilu. Hija spiss tkun deskritta bħala l-qari tal-Kelma ta’ Alla f’atmosfera ta’ talb, imma aktar minn hekk, din hija il-qari tal-Kelma ta’ Alla li ssir talba.
Il-metodu tradizzjonali huwa wieħed sempliċi u jinkonsisti f’erba’ passi, li jridu jsiru f’atmospera ta’ ġabra u skiet. Importanti li qabel nibdew, aħna ninfetħu għall-preżenza tal-l-Ispirtu s-Santu li hemm fina, u li kien huwa stess li nebbaħ l-awturi sagri fil-kitbiet tagħhom tat-testi bibliċi.
Il-passi ssuġeriti fil-Lectio Divina huma dawn …
(a) Il-qari tas-silta.
(b) Il-meditazzjoni fuq dak it-test li jkun inqara.
(ċ) Mument ta’ talb. Hawn jistgħu jintuħzaw is-Salmi bibliċi, deskritti mill-Papa Franġisku bħala sinfonija ta’ talb. Ara hawn …
(d) Il-kontemplazzjoni. Din tal-aħħar hija differenti ħafna mill-mediazzjoni, għaliex fiha aħna nkunu mistiedna nistrieħu fil-preżenza tal-Mulej. Spiss tfakkarni fid-dixxiplu l-maħbub, b’rasu mistrieħa fuq sider Ġesù.
Bħad-dixxiplu l-maħbub, insibu fl-Evanġelju, l-esperjenza ta’ diversi personaġġi oħra, li wara l-laqgħa li huma kellhom mal-Imgħallem, il-mixja tagħhom tal-ħajja, inbidlet f’pellegrinaġġ veru tat-tama.
Hawn taħt issib xi suġġeriment ta’ siltiet li nistgħu nirrakomandaw. Imma minbarra dawn hemm tant oħrajn mill-Iskrittura kollha. Jekk xi silta tkun waħda twila, tista’ titqassam f’mumenti differenti. Hemm ukoll uħud fil-lista li fihom aktar minn silta waħda. Għalkemm dawn ikunu kollha relatati mat-tema ewlenija, madankollu, anke huma jistgħu jittieħdu f’waqtiet differenti.
(Għal kull silta, qed jitħejjew xi għajnuniet għal-Lectio Divina. Hawn taħt qed nagħtu l-link ta’ kull waħda li titlesta.)
Fl-Evanġelju naqraw dwar …
- Marija żżur lil Eliżabetta. (Lq 1:39-56) – lectio
- Il-pellegrinaġġ tat-tama tal-familja ta’ Nazaret lejn Betlehem (Lq 2:1-7), lejn l-Eġittu u lura (Mt:2:13-23), lejn it-tempju ta’ Ġerusalemm kemm b’Ġesù ta’ erbgħin jum (Lq:2:22-40) u kemm tnax ‘il sena wara (Lq 2:41-52) –lectio
- Ġwanni l-għammiedi, xhud tad-dawl. (Ġw 1:6-23) u (Ġw 1:29-34) – lecio
- L-ewwel żewġ dixxipli li mxew wara Ġesù. (Ġw 1:35-42)
- Filippu u Natanajel. (Ġw 1:43-51)
- Il-qaddejja fit-tieġ ta’ Kana. (Ġw 2:1-12)
- Mattew minn wara l-mejda tat-taxxi. (Mt 9:9-13)
- Nikodemu li mar għand Ġesù bil-lejl. (Ġw 3:1-21)
- Il-mara akkużata li nqabdet fl-adulterju. (Ġw 8:1-11)
- Il-mara mis-Sammarija. (Ġw 4:1-42)
- Il-qaddej taċ-ċenturjun (Lq 7:1-10)
- L-għama ta’ Ġeriko. Li nara, Mulej. (Lq 18:35-43)
- Marta u Marija. (Lq 10:38-42)
- Omm il-mara ta’ Xmun. (Lq 4:38-41)
- Żakkew il-publikan. (Lq 19:1-10)
- Id-dixxiplu l-maħbub li serraħ rasu fuq sider Ġesù
- Marija ta’ Magdala. Appostlu tal-Appostli (Ġw 20:11-18)
- Iż-żewġ dixxipli fit-triq ta’ Għemmaws. (Lq 24:13-35)
- Pietru. Mulej, inti taf li jiena nħobbok. (Ġw 21:15-19)
- Tumas. Mulej tiegħi u Alla tiegħi. (Ġw 20:24-29)
Nistgħu nieħdu, wkoll siltiet mill-istejjer li rrakkonta Ġesù nnifsu, dawk li nafuhom bħala l-parraboli. Inkella hemm ukoll il-nirakli, jew kif isejħilhom ir-raba’ Evanġelista s-sinjali. Nistgħu nieħu siltiet qosra mit-tagħlim ta’ Ġesù, bħal ngħidu aħna il-priedka tal-muntanja jew id-diskors ta’ Ġesù fl-aħħar ċena. Hemm tant u tant aktar.
Importanti li bl-għajnuna tal-Ispirtu s-Santu, aħna ninnamraw mal-Kelma ta’ Alla.
Kitba ta’ Joe Farrugia
Fittex aktar dwar il-Lectio Divina minn hawn … https://laikos.org/ld/
Aktar fuq il-Ġublew: Pellegrini tat-Tama … https://laikos.org/g2025/