… miktuba mill-Arċipriet Joseph Curmi
Fl-isem tal-Missier u tal-Iben u tal-Ispirtu s-Santu. Ammen.
Cantate Dominum, canticum novum,
Quia mirabilia fecit
Għannu lil Mulej għanja ġdida,
għax għamel ħwejjeġ tal-għaġeb.
Din il-lejla wisq sabiħa fejn il-ksieħ ma jbeżża’ ’l ħadd. In-ngħas li jaqa’ fuq għajnejna f’dan il-lejl bħal inħossuh itellifna u nagħmlu minn kollox biex inkeċċuh. Din il-lejla toffri tama. Tiftaħ bibien fil-qlub li jkunu ilhom żmien magħluqa.
“Għax tweldilna tifel,
ingħatalna iben;
is-setgħa tkun fuq spallejh, u jsemmuh:
Kunsillier tal-għaġeb, Alla setgħan,
Missier għal dejjem, Prinċep tas-sliem” (Iż 9:5).
Din hi l-lejla tal-familja. F’din il-lejla kull familja, kull persuna tista’ tħossha parti mill-Familja ta’ Nazaret. F’din il-lejla kulħadd, maħbub jew imwarrab, b’saħħtu jew marid, kalm jew imweġġa’, jista’ jidħol għas-sħana tal-familja li ħalliet kollox biex tkun tista’ tilqa’ wild ġdid, biex tkun tista’ tilqa’ l-Iben ta’ Alla.
Għalhekk ħalluni llum b’erba’ kelmiet fqajra neħodkom tul dan il-vjaġġ tal-Familja ta’ Nazaret. Ħalluni nerġa’ nsaħħarkom bis-sbuħija tal-familja, għax kollha kemm aħna, nafu jew ma nafux, nixtiquha.
Marija u Ġużeppi
L-istorja tibda b’mod stramb. Tfajla u ġuvni, Marija u Ġużeppi, li jinħabbu tant li lesti biex jiffurmaw familja flimkien. Anġlu jwassal is-sejħa ta’ Alla biex flimkien jilqgħu tarbija mnissla mill-Ispirtu s-Santu u mwielda minn Marija. Huma jitħawdu u jibżgħu, għax it-tarbija hi l-Messija. Iżda l-maturità tagħhom twassalhom biex jerħu l-pjanijiet tagħhom u jibdew jgħixu għal din it-tarbija li se titwieled.
Għeżież, ħalluni ntennilkom il-kelma tal-anġlu: “La tibżgħux”. Kemm sirna nibżgħu nikkommettu ruħna! Iva, il-ħajja ta’ Ġużeppi u Marija tinbidel f’ħakka t’għajn. Filli bil-pjanijiet tagħhom u filli kollox idur mat-tarbija. Imma mhux hekk sabiħa l-ħajja? Mhux hekk għallimna Kristu bl-eżempju tiegħu? “Jekk il-ħabba tal-qamħ ma taqax fl-art tibqa’ weħidha” (Ġw 12:24)? Tbeżżgħuhomx miż-żwieġ liż-żgħażagħ tagħna. Titkellmux ħażin dwar is-sagrifiċċji li titlob kull vokazzjoni. Sagrifiċċju mhux ismu miegħu? Imma dak hu li jagħti l-ħajja.
Jispiċċaw f’għar
U malli Ġużeppi u Marija jilqgħu s-sejħa kbira, ikollhom imorru Betlehem. Għax jaħasra kienet familja li kieku aħna ngħidulhom: “Imsieken, kollox jiġihom ħażin”. Kellhom imorru jinkitbu. U post ma jsibu mkien. Ifakkruni ħafna fiż-żgħażagħ tagħna, li bħal donnu wisa’ għall-bejta tagħhom m’hemmx. Ifakkruni fl-għarajjes tagħna li jagħrqu l-għaraq tad-demm biex ikollhom saqaf fuq rashom. Ifakkruni f’tant familji żgħar li jirriskjaw li biex iħallsu l-loan tal-“house” jitilfu l-“home”.
Kemm nitkażaw b’sid il-lukanda fl-istorja ta’ Betlehem! Hemm bżonn li bħala soċjetà u Knisja nitkażaw ftit iktar b’din l-inġustizzja, għax kulħadd għandu dritt li jkollu roqgħa art fejn jibni l-bejta tiegħu. Iva, hemm bżonn li ma noqogħdux ninħbew fuq min jaqbillu u min ma jaqbillux. Ħadd ma jaqbillu li l-familja titkisser. Ħadd ma jaqbillu li l-bniedem ikun stressjat. Ħadd ma jaqbillu li tikber id-differenza bejn il-fqir u s-sinjur.
Jaħarbu biex jipproteġu lil Ġesù
U l-istorja ta’ din il-familja ma tiqafx hawn. Għax wara ftit żmien ikollhom jaħarbu lejn l-Eġittu. Jaħarbu biex jipproteġu lit-tarbija. Għax fejn hemm il-qalb jimxu r-riġlejn. U l-Familja ta’ Nazaret kellha fiċ-ċentru ta’ qalbha, lil binhom Ġesù. Bħala tifel ħalluni ngħidilkom minn qalbi: intom il-kbar komplu ddefenduna. Bħal Marija u Ġużeppi aħarbu bina f’postijiet siguri. Il-flus waħedhom ma jagħmlux la tfal u lanqas tfal maħbubin. Agħżluna u tħallux il-ġenn isir iktar importanti minna. Tibżgħux teħduna fejn jagħmlilna l-ġid anki jekk ma rridux. Tibżgħux tgħidulna “le” fejn hemm bżonn, anki jekk negħjukom ninsistu. Tibżgħux tiġġieldu ma’ min joqgħod jheddidna u jhedded il-ħin tal-familja b’ħafna appuntamenti, lezzjonijiet, provi u training żejda. Tibżgħux tiġġieldu biex l-edukazzjoni fl-iskola tkun biżżejjed mingħajr bżonn ta’ ġiri u privatijiet żejda. Jekk ma tiddefenduniex intom, min se jaqbeż għalina?
Nixtieq nimmaġina x’ħassew Ġużeppi u Marija meta f’nofs ta’ lejl kellhom jaħarbu! Min jaf kemm bkiet Marija! Min jaf Ġużeppi kemm ħassu ħażin li ma jistax jagħti ftit kalma lill-familja tiegħu! U bħalissa qed jiġuni f’moħħi tant ġenituri li laqgħu t-tfal tagħhom bi bżonnijiet speċjali u ta’ kuljum jegħjew jippruvaw jaraw kif se jħobbuhom bl-aħjar mod. Jiġini f’moħħi l-biki fis-skiet tagħhom u l-inkwiet dwar kif se jgħixu fil-futur. Jiġuni f’moħħi l-ġenituri li jibku għax, għalkemm għamlu li setgħu, xorta jħossu li fallew ma’ wliedhom.
Għeżież, għalhekk sabiħa l-istorja ta’ din il-familja, għax iktar ma l-affarijiet jiġuk ħażin, iktar tħossok f’postok magħhom. Iktar ma l-ħajja tagħtik fuq wiċċek, iktar tista’ tħosshom qribek.
It-tama
L-istorja tal-Familja ta’ Nazaret hi sabiħa għax timla bit-tama. Ġużeppi u Marija, meta aċċettaw din il-missjoni, kellhom il-fidi li l-Mulej, li qabbadhom għaliha, se jkun magħhom tul it-triq kollha. Id-diffikultajiet ma sparixxewx. Iżda fid-dlam ta’ Betlehem idda dawl. U fil-mument li Erodi ried joqtol lil binhom, jidher l-anġlu. U fil-mument tal-mewt ta’ binha fuq is-salib, Marija tibqa’ wieqfa u ma tikkrollax.
Kemm jien ferħan li llejla qed ngħidilkom dawn il-kelmiet! Għax dawn mhumiex biss kelmiet ta’ kuraġġ, iżda hi l-verità. Ħalluni naqsam il-ferħ magħkom u nagħmlilkom il-qalb. Morru agħmlu l-qalb ukoll lil tant nies hemm barra li jħossu li l-ħajja hi bla sens. Morru għidu lil dawk li jħossu li fil-ħajja kollox jiġihom ħażin… għidulhom li llum il-Milied!
Ħalluni llum ninqeda bi kliem il-poeżija biex naqsam magħkom dan il-ferħ li għandi.
Ġesù twieled bambin ċkejken,
bin Ġużeppi u Marija,
l-anġli kollha ħarġu jxandru
kollhom ferħ f’dinja mifdija.
Kif qatt tista’ qalbna tifraħ
jekk madwarna għawġ, biki, lfiq,
stejjer koroh, ġlied u dmija,
’qas fi djarna ma nsibu kwiet?
Imm’int għalhekk fil-faqar ġejt
f’lejl kiesaħ u f’għar imneżża’,
biex min f’qalbu jħoss id-dwejjaq
jaf li fejnek ħadd mhu mbeżża’.
Ġew it-tajba, ġew il-ħżiena,
ġew il-maġi u ġew ir-ragħajja,
kulħadd joffri milli għandu
għarkupptejh ħdejn Sid il-ħajja.
X’ma nifraħx, o Bambin ċkejken,
xħin tal-Milied jersaq iż-żmien,
u kulħadd presepju jżejjen
b’siġra ħelwa b’dwal u lwien!
Iżda mhux kulħadd hu bħali,
hawn min qalbu mweġġgħa wisq,
hawn min waħdu jkollu joqgħod,
hawn min tilef imħabba w risq.
Hawn min ħdejn marid fis-sodda
ser iqatta’ dal-Milied,
hawn min jixtieq illi kieku
ġo familtu jieqaf il-ġlied.
Hawn min f’ħabs se jgħaddi għomru,
hawn min żbalja u le maħfur,
hawn min safa f’qalbu mkisser,
hawn min fl-inkwiet moħħu jdur.
Iżda dan hu lejl ta’ tama
għal kull bniedem ta’ did-dinja,
għaliex Alla li sar bniedem,
minn zokk niexef joħroġ rimja.
Għalhekk, ifraħ int li tisma’
mhux biss bl-ikel u r-rigali:
l-ikbar Rigal li rat id-dinja
ġie jitgħabba bl-għelt u l-għali.
Grazzi, grazzi, Bambin tiegħi,
għax għar twelidek mingħajr bieb –
ħalli llejla kulħadd jidħol,
sew jekk għedewwa, sew jekk ħbieb.
Hawn se nieqaf bl-għanja tiegħi
u nħallik torqod ftit ħin,
mhux għax int xi darba torqod:
int Alla bniedem mal-bnedmin!
Viva Ġesù Bambin!