Omelija f’Quddiesa f“Villa Deportiva Regional Ucayali” (Pucallpa)

VJAĠĠ APPOSTOLIKU TAL-QDUSIJA TIEGĦU LJUN XIV
FL-URUGWAJ, L-ARĠENTINA U L-PERÙ
6-17 ta’ Novembru 2026

QUDDIESA
OMELIJA TAL-QDUSIJA TIEGĦU LJUN XIV

“Villa Deportiva Regional Ucayali” (Pucallpa)
Il-Ħadd 15 ta’ Novembru 2026

Omelija tal-Papa

Għeżież ħuti,

B’ferħ kbir qed niċċelebra magħkom l-Ewkaristija llum. Meta ninġabru bil-fidi madwar l-altar tal-Mulej, il-kelma tiegħu tidħol fil-ħajja tagħna u timlieha bis-sens. Għalina lkoll hi aħbar ta’ salvazzjoni. Illum, f’din il-belt, dak hu li qed jiġri: il-Vanġelu li għadna kemm smajna hu fil-fatt parabbola, li tistedinna nirriflettu fuq ir-relazzjoni tagħna ma’ Alla.

Waqt li Ġesù jirrakkonta l-ġrajjiet ta’ sid mal-qaddejja tiegħu, leħnu qed jitlob lill-qlub tagħna attenzjoni partikulari, biex insibu s-sens veru tal-kliem li qed jgħidilna. Xi jfisser għal Alla li jkun Sid? U xi jfisser għall-bniedem li jkun qaddej? Dawn il-kelmiet, hekk immarkati fid-dinja minn relazzjonijiet ibsin ta’ poter, jiksbu tifsira ġdida u sorprendenti fuq fomm Kristu. Hu jlissinhom apposta biex iġedded il-mod tagħna ta’ kif naħsbu u naġixxu. Fil-fatt, lil min fid-dinja hu qaddej, Ġesù jħabbarlu l-libertà, u lil min jaħseb li hu sid, jgħallmu jikkonverti. Huwa u jsejjaħ lil kulħadd għall-fraternità, l-uniku veru Sid jistedinna nibdlu ħajjitna, nibdlu r-relazzjonijiet u s-soċjetà li ngħixu fiha.

Mela ħa nisimgħu x’jirrakkonta Kristu fil-parabbola: “qaddej tajjeb u fidil”, jgħid il-protagonista, “idħol fl-hena ta’ sidek” (Mt 25:21,23). Dan it-tifħir jurina qabelxejn illi li nkunu tajbin u fidili jfisser nikkorrispondu mat-tjieba u mal-fiduċja li nirċievu mingħand Alla. Ix-xogħol li hu jitlob minna mhux sinjal ta’ oppressjoni u ta’ distanza, imma rahan ta’ kondiviżjoni u ta’ ferħ. Il-Mulej qabel kulħadd hu twajjeb magħna u jafdalna l-ġid tiegħu. Is-sinjal ta’ din it-tjieba huwa t-talenti prezzjużi li dwarhom titkellem il-parabbola, li jsiru f’idejna ħidma u responsabbiltà, biex nagħmlu l-frott ta’ għemejjel tajba. Dawn it-talenti huma l-kwalitajiet li jagħmlu tajba l-ħajja, l-ewwel don ta’ Alla: meta nħaddmuhom, inkunu nitħarrġu fil-prattika tal-ġustizzja u nfittxu l-verità, nieħdu ħsieb tal-proxxmu u tas-soċjetà. Hekk inkattru l-ġid li rċivejna, nużaw b’intelliġenza dak li l-Mulej fdalna f’idejna.

Min-naħa l-oħra, imma, il-parabbola titkellem dwar “qaddej ħażin u għażżien” (Mt 25:26), li s-sid jgħidlu: “kont taf li jien naħsad fejn ma żrajtx u niġbor fejn ma xerridtx” (ibid.). Kliem Ġesù jgħaddina mill-prova: is-sid, jiġifieri Alla, forsi ma kienx twajjeb u ġeneruż mal-qaddejja tiegħu, jiġifieri magħna? Ċertament! Imma xorta hemm min ma jafdax fih, u jżommu bi bniedem qalil (v. 24), bla ħniena u jisfrutta lill-oħrajn. Imma Alla jgħidilna: jiena nafda fil-ħiliet tiegħek, bl-ebda mod ma rrid ngħaffeġ lil ħajtek, imma nħobbha. Jiena naqsam miegħek il-ġid tiegħi: nafdahulek biex tagħmel il-frott minnu, għall-ferħ li rrid naqsam ma’ kulħadd. Allura, il-qaddej tal-parabbola hu ħażin għax jaħseb li Alla hu bħas-sidien ta’ din id-dinja. U s-sidien ta’ din id-dinja spiss jaħsbu li huma bħal Alla. Ġesù l-ewwel mhu jċanfar mhix it-telqa tal-qaddej, imma l-kuxjenza ħażina tiegħu, dik li ġġagħlu jgħid dwar is-sid: “lilek nafek bħala raġel aħrax, taħsad fejn ma żrajtx u tiġbor fejn ma xerridtx” (v. 24). Hekk il-parabbola ssejħilna biex ngħaddu mill-biża’ mill-Mulej għall-fiduċja fih, mill-jasar ta’ min hu mbiegħed minn Alla għall-qsim tal-ferħ li jiġi minnu. Fi kliem ieħor, biex insiru konxji li aħna wlied maħbuba tiegħu.

Il-parabbola rrakkontata minn Ġesù hi attwali ħafna għax tistaqsina x’aħna qegħdin nagħmlu bil-ġid li jagħtina Alla, qabelxejn bil-ġid tal-ħajja u bil-ġid tal-art. It-tnejn huma strettament marbuta ma’ xulxin: ma hemmx waħda mingħajr l-oħra. Is-saħħa tal-ħajja tagħna u dik tal-art li ngħixu fiha jmorru id f’id: għalhekk, kulma jfieri d-dinjità tal-ħajja jeqred il-ġmiel tal-art. L-intraprendenza tal-bniedem u l-għożża tal-ħolqien imorru flimkien: għalhekk dak kollu li jisfrutta x-xogħol ikun jisraq lill-ambjent. Il-paċi soċjali u l-ekwilibriju ekoloġiku jmorru id f’id: għalhekk il-vjolenza magħmula lill-poplu hi vjolenza fuq l-art u l-vjolenza magħmula lill-art hi vjolenza fuq il-poplu.

Għeżież ħbieb, il-kelma ta’ Kristu tidħol hawn fit-traġedja tal-istorja tagħna: mal-ilħna tal-predeċessuri tiegħi, il-Papa Benedittu XVI u l-Papa Franġisku, inxierek tiegħi biex nuri r-rabta ta’ swied il-qalb li teżisti bejn “il-qerda ambjentali tal-Amażonja u t-theddid lid-dinjità umana tal-popli tagħha” (Benedittu XVI, Diskors liż-żgħażagħ, 10 ta’ Mejju 2007, 2; ara Franġisku, Eżortazzjoni appostolika Querida Amazonia, 12). Kemm sar ftit, u kemm sar bil-mod, filwaqt li żdiedu l-istrumenti biex jaħbtu għall-ħolqien u jniġġsuh. Quddiem dan il-ħażen, ejjew ma naħbux taħt il-ħamrija t-talenti tal-Mulej, li jagħtina l-qawwa biex insewwu u nikkuraw it-tbatija kkawżata minn għatx klubi ta’ ħakma. F’dan il-kuntest, il-Vanġelu li għadna kemm smajna jsir tħabbira ta’ fidwa u ta’ tama għall-poplu kollu. Issa jmiss lilna, lil kull wieħed u waħda minna li nwieġbu b’koerenza u kuraġġ, u ngħidu lill-Mulej: “Grazzi tat-talenti li tagħtina! Irridu nużawhom għall-ġid ta’ kulħadd”. Issa jmiss lilna, lil kull wieħed u waħda minna, li ngħidu lill-proxxmu tagħna: “Int għalija ħija, oħti. Ejjew nieħdu ħsieb flimkien tat-talenti li jagħmlu l-frott ta’ ħajja tajba f’din il-belt, f’pajjiżna, fil-futur li rridu nibnu bħala żmien ta’ ġustizzja u ta’ paċi”.

Din ir-rieda ssib sinteżi f’ġest li nagħmlu fil-Quddiesa, meta nġibu fuq l-altar il-frott tal-art u x-xogħol tal-bniedem. Il-mejda li l-Mulej iħejji għalina ddaħħalna fi qsim ta’ doni, li nippreżentaw lil Alla biex imbagħad inqassmuhom fid-dinja. Għad-dawl tal-Vanġelu, nistedinkom allura biex tkattru t-talenti li l-Mulej jafdalna, u tieħdu ħsieb ta’ tliet realtajiet.

Qabelxejn, ħudu ħsieb flimkien tal-fidi. Kunu poplu li jiċċelebra s-salvazzjoni ta’ Alla u jdewwi l-ġrieħi tal-umanità. Fil-fatt, huwa hekk li l-Knisja tinqeda bil-kliem tal-bniedem biex tgħid il-verità ta’ Alla u tipprietka l-kelma ta’ Alla biex tħabbar il-verità tal-bniedem. Fuq l-eżempju ta’ Kristu, il-Verb magħmul bniedem, osservaw ir-realtà ta’ kuljum bl-għerf li jiġi mill-Vanġelu, waqt li tiftħu għal kulħadd futur ta’ ġustizzja. Din il-missjoni tibda fit-talb u hi mitmugħa mis-Sagramenti: bħala opra tal-Knisja kollha, isseħħ fil-familji u fil-parroċċi, fit-toroq u fl-iskejjel, fl-isptarijiet u fil-ħabsijiet. Kunu kullimkien ħawtiela biex tkattru t-talenti tal-Mulej, tippromovu l-komunjoni mal-bnedmin kollha ta’ rieda tajba.

It-tieni nett, inħeġġiġkom tikkultivaw l-umanità tal-għaġeb tagħna. Dan l-impenn imiss qabelxejn liż-żgħażagħ, li huma l-wegħda tal-poplu Peruvjan. Imiss l-għożża għaċ-ċkejknin u l-ħarsien tal-anzjani, imiss is-solidarjetà mal-foqra u l-maħqura. Li nagħmlu l-ġid jesiġi minna li niġġieldu lill-vjolenza bl-imħabba, u li nwieġbu bl-onestà għall-korruzzjoni. Hemm fejn il-bniedem hu mogħti l-għożża li jistħoqqlu, l-art twarrad u l-kultura tal-imħabba sana tfejjaq mit-tinġis morali, li hu kawża ta’ kull ġerħa magħmula lill-ħolqien, id-Dar komuni tagħna.

Fl-aħħar nett, quddiem kull prova, ikkultivaw dejjem il-ferħ. In-Nisrani jaf li dan ma jiġix mid-drogi tal-għana u tal-poter, li jqarrqu bil-qalb u jħalluha f’iktar tbatija. Il-veru ferħ ġej mill-fidi, għax din għandha bħala bażi l-grazzja ta’ Alla, li tagħmel il-frott fl-għotja tagħna bħala aħwa lil xulxin. Waqt li ngħaddu minn tiġrib u sfidi, ejjew nibnu flimkien soċjetà ferħana, paċifika, ħielsa, u nħarsu lejn il-Mulej Ġesù, li jġib is-sliem bis-salib tiegħu, għax jieħu fuqu kull diffikultà tagħna. Nitolbu lilu, il-Feddej, biex isieħeb il-mixi tagħna u jagħtina d-dawl tat-tama. Ommu Marija, Verġni Immakulata, tfarraġna u tipproteġina dejjem.

Inti x'taħseb dwar dan is-suġġett?